إزاي تستفاد من الإنترنت في الوصول للوظيفة اللي نفسك فيها؟ | الجزء الأول

أغلبنا بيستخدم الإنترنت بنسبة معينة للبحث عن فرص عمل، لكن.. هل بنستخدمة بكفاءة في اننا نوصل للوظيفة اللي احنا عاوزينها؟
الموضوع ده مش عشان تعرف “إزاي تكتب سيرة ذاتيه احترافية؟” أو “كيف تجتاز مقابلة العمل بنجاح؟”.. الموضوع ده –مكون من جزأين- هدفه اننا نعرف طرق جديدة نوصل بيها للوظيفة اللي عاوزينها واحنا قاعدين على الانترنت، ونوسّع دائرة البحث بتاعتنا من خلاله عشان تفيدنا في الوصول للوظيفة في وقت أقل.1

مفيش شك انك عشان توصل للوظيفة اللي انت عاوزها -مش أي شغلانة والسلام- انت محتاج في الأول خالص تكون محدد هدفك، ومجاوب على الأسئلة دي “إيه هو المجال اللي أنا هشتغل فيه؟” و”إيه هي الوظيفة اللي هكون مبسوط وأنا بشتغلها وهتحقق لي طموحاتي؟”؛ وليكن انك اخترت “مجال تكنولوجيا المعلومات” وحددت الوظيفة اللي هي “مهندس برمجيات”، أو حتى أكتر من وظيفة، المهم تكون محددهم.. يعني ممكن تضيف كمان “مطور برامج” أو “مدير مشروعات” في نفس المجال أو الصناعة.2

بعد ما تكون حددت المجال والوظيفة المناسبين ليك.. تعالا نشوف إزاي الإنترنت ممكن يساعدنا نقرّب للهدف بتاعنا، الخطوات أو الطرق اللي هنقولها كلها اونلاين بس هتحتاج منك مجهود لحد ماتحقق منها هدفك، وده مايمنعش انك تكون بتتحرك على الأرض على التوازي.

- أدوات بناء السيرة الذاتية وتسويقها

طبعاً هتكون الخطوة الأولى بعد تحديد التخصص هي التعبير عن نفسك وإمكانياتك اللي تناسب الوظيفة في السيرة الذاتية الخاصة بيك.
السيرة الذاتية: بافتراض إنك أول مرة تكتب سيرة ذاتية.. استخدم أداة CVMaker واللي هتساعدك تبني سيرتك الذاتية بشكل احترافي وفي وقت قليل.. بعد كده قيّم سيرتك الذاتية باستخدام الأدوات دي Rezscore و ResumeChecker عشان تتعرف على أوجه القصور فيها وترجع تعدّل فيها تاني وتحسنها لحد ما توصل لأفضل حاجة عندك.3

الخطاب التعريفي: مهم وانت بتقدم السيرة الذاتية عن طريق الإيميل تكون كاتب خطاب بتقدم فيه عن انت بتعمل إيه، وتشرح فيه مدى ملائمتك للوظيفة اللي بتقدم عليها، الأحسن انك تكتبها في قلب الرسالة نفسها في الإيميل وتكون السيرة الذاتية في المرفقات. يفضّل تتعلم تكتبه بنفسك وتقول فيه “انت ليه اخترت الوظيفة دي بالتحديد؟ وإيه اللي يخليك مؤهل ليها؟”، لحد ما الشخص اللي بيقرأ الإيميل يوصل له اهتمامك فعلاً بالفرصة دي بالذات.

تقدر تتعلم كتابة الـ Curriculum Vitae أو الـ Cover Letter من خلال البحث في موسوعة wikihow، أو هتلاقي موضوعات مكتوبة باللغة العربية لو بحثت في أي محرك بحث بكلمة “الخطاب التعريفي”.

- مواقع التوظيف

أغلب مواقع التوظيف بتوفر لك إمكانية عمل ملف خاص بيك “سيرة ذاتية” اونلاين، وبترشح لك بشكل دوري الوظائف المناسبة لمهاراتك حسب المؤهلات والمهارات اللي انت كاتبها في الملف ده.


المجموعة دي تعتبر من أفضل مواقع التوظيف الموجودة دلوقتي في الوطن العربي “من المحيط إلى الخليج”: وظّف، بَيْت، الوسيط، ليمون، أخطبوط، جالف تالنت. ابدأ انشئ الملف الخاص بيك عليهم، ابحث عن الوظائف المناسبة وقدّم عليها في خطوات بسيطة.

على فكرة مواقع التوظيف كتيييره جداً، ده كمان فيه مواقع توظيف متخصصة في مجالات بعينها (يعني بتعرض وظائف “المبيعات في مجال الصيدلة” بس، أو “وظائف تكنولوجيا المعلومات” بس)، وممكن كل موقع تلاقي عنده وظائف مختلفة عن التاني لإختلاف مصادرهم أحياناً… لكن المهم تركز انت عاوز منها إيه؟، وعلى قد ماتقدر ماتاخدش وقت كتير عليهم.. يعني: استخدم موقع واحد أو اتنين بالكتير وتعالا للخطوات اللي بعدها.

- محركات البحث عن الوظائف

محركات البحث عن الوظائف هي مواقع بتوصّلك بالوظائف اللي موجودة في السوق، لكن هي نفسها مش بتجمّع الوظائف بشكل مباشر، هي بتجمّع الوظائف من أكتر من “موقع توظيف”، وأكتر من مصدر إعلانات للوظائف (يعني ممكن تجيب من الجرائد كمان) عشان تقدر انت تبحث عن اللي عايزه من مكان واحد؛ فبالتأكيد هتوفر لك وقت.. بدل ماتدخل تدوّر على كل موقع لوحده، انت بتبحث في أكتر من 5 أو 10 مواقع توظيف مرة واحدة بس، وبتعرض لك النتائج دي كلها في مكان واحد!

من “محركات البحث عن الوظائف” دي عندك تنقيب، و indeed و Jobzella بيخدموا المنطقة العربية. المواقع دي فيهم خاصية “التنبيهات” بحيث يعملوا البحث اللي انت عاوزه تلقائياً ويبعتولك النتائج اللي انت مهتم بيها على الإيميل، أول بأول من غير ماتدخل تعمل بحث تاني كل كام يوم.. مهم تستخدم الخاصية دي عشان تستثمر وقتك في بقية الخطوات.

- وكالات التوظيف

واحدة من الخدمات المهمة واللي قليل لما بنستفاد منها هي “وكالات التوظيف” أو “شركات التوظيف”، اللي بتقوم بدور الوسيط بين الشركات اللي عندها فرص عمل وبين طالب الوظيفة. وكالات التوظيف (ومنها مثلاً Jobmaster و Jobrp) بتكون وكيل للشركات اللي معندهاش قسم إدارة موارد بشرية (مش شرط انها تكون شركة صغيرة) في انها تختار وتعيّن لهم الأشخاص الكفؤ بدل من الشركة نفسها.

طيب، المفروض تعمل إيه مع وكالات التوظيف؟ هتدخل على الموقع بتاعهم، ياإما هتلاقى إمكانية انك تملى استمارة ببياناتك عندهم، وبتحدد فيها “المجالات” اللي نفسك تشتغل فيها؛ أو انك تبعت لهم سيرتك الذاتية علاطول.. بحيث أول مايكون عندهم فرصة مناسبة ليك، متاحة في شركة/ مؤسسة من الشركات المتعاقدين معاهم.. يتواصلوا معاك.


أوقات كتير وكالات التوظيف هي اللي بتنظم “ملتقيات التوظيف”. احرص انك تكون مسجل سيرتك الذاتية عندهم أو تكون موجود في قاعدة بياناتهم. دوّر على وكالات التوظيف اللي موجودة في بلدك عن طريق البحث بالإسم المعروفة به في السوق: Recruitment Agency و Recruitment Company .

اشتغلوا على الأدوات والخطوات دي كويس خلال الإسبوع ده، والإسبوع الجاي هنقولكم على أدوات جديدة وطرق مميزة.. جرّبوا وقولوا لنا أسئلتكم ورأيكم في الموضوع.


  1. هذا الموضوع مكتوب باللغة العامية كتجربة لتقديم محتوى مناسب لأهل بلدان بعينها أثناء فترة الموقع التجريبية، إلا أن أغلب المحتوى الذي نقدمه نراعي كتابته باللغة العربية الفصحى ليناسب أغلب الشباب العربي، راسلونا لنعرف آرائكم.

  2. لو انت مش عارف اوي تخصصات المجال بتاعك أو الدراسة اللي انت درستها ممكن تستعين بموقع TheCareerProject عشان تتعرف على مجالات العمل المتاحة في كل تخصص.

  3. السيرة الذاتية لبعض المهن بتتقدم بشكل مختلف، لو بتشتغل في مجال الفنون البصرية، التصوير أو التصميم أو عمل إبداعي أو فني تقدر تعمل فيديو يعرضه بشكل مميز مدته 3 دقائق وترفعه على Youtube أو Vimeo، وده هيساعد كمان إن شغلك ينتشر وربما يتواصل معاك ناس من دول مختلفة.

باسم مُسلَّم

مدير البحث والمحتوى لـ "نتـنولوچي"، مهتم بالبحث والكتابة حول موضوعات "الإنترنت والمجتمع" عن كيفية الاستفادة من الشبكة وأثرها على الناس.


comments powered by Disqus