إزاي تستفاد من الإنترنت في الوصول للوظيفة اللي نفسك فيها؟ | الجزء الثاني

في الجزء الأول من الموضوع اتكلمنا عن الأدوات اللي هتساعدنا في تسويق السيرة الذاتية وإزاي نتعرض لأكبر كم من الوظائف اللي تناسبنا، تعالوا انهارده نتعرف على أدوات وطرق تانيه في التعبير عن مهاراتنا والبحث بدقة أكبر عشان نوصل لنتايج أفضل.

- البحث بكلمات مفتاحية عن الوظيفة المطلوبة

في العادي بيكون “البحث اونلاين” هو أسهل وأسرع وسيلة نستخدمها لما بندوّر على وظيفة، عشان كده محتاجين نطوّر مهارات البحث على الإنترنت عندنا، خصوصاً إن حاجات بسيطة ممكن تفرق معانا كتير! تعالا ناخد المثالين دوول ودرّب نفسك عليهم كويس جداً:

غالباً وانت بتدور على وظيفة هتحتاج إن البحث بتاعك يتضمن 3 كلمات.. على سبيل المثال (الوظيفة + الموقع الجغرافي + كلمة مفتاحية)

يعني مثلاً لو انت هتشتغل في مجال “الجودة والمراقبة” ممكن يكون بحثك بالكلمات دي: Quality Control + Egypt + is hiring

أو لو عاوز تشتغل “مطور برمجيات” لكن في شركة ناشئة مش هتطلب خبرة، هتكتب: Software Engineer + Cairo + Startup

الكلمة التالتة دي هي “الكلمة المفتاحية” اللي هتتحكم في إن النتائج اللي هتطلعلك -من بين الآف النتائج الموجودة اونلاين- تكون في صفحة شركة ما فيها وظيفة بالفعل؛ فهيكونوا كاتبين is hiring أو is recruiting في عنوان أو وصف الوظيفة. هتحتاج تتعب شويه في التفكير في “كلمات مفتاحي عشان توصل لنتائج مناسبة ليك علاطول.

خدمة التنبيهات :Alerts من الخصائص اللي ممكن تسهل عليك كتير انك تفضل تكرر عملية البحث كل كام يوم عشان تشوف النتائج الجديدة.. إزاي؟ هتستخدم خدمة زي “تنبيهات جوجل” Google Alerts وتكتب في “طلب البحث” (الوظائف اللي انت بتدوّر عليها + كلمات مفتاحية).. تنبيهات جوجل هتعمل البحث ده بشكل أتوماتيكي وتبعتهولك على الإيميل بشكل دوري (حسب اختيارك: عند حدوثها/ مرة يومياً/ مرة إسبوعياً).

- البحث عن الشركات المستهدفة ومتابعتها

جزء مهم من مرحلة البحث عن عمل وانت بتستخدم الإنترنت انك تتابع بشكل منتظم أخبار الشركات/المؤسسات اللي انت حابب تشتغل معاهم، تتابع صفحاتهم على مواقع التواصل الإجتماعي وتتابع موقعهم الإلكتروني، ساعتها هتكون أول واحد يعرف بالوظائف أو الفرص اللي هتوصلك لو انت مسجل ايميلك في نشرتهم البريدية، أو هتعرفها لو انت عامل لصفحتهم “احصل على التنبيهات” get notified في فيسبوك، أو ضايفهم لقائمة الإهتمامات عندك في تويتر أو لينكدإن.

اتعرّف على الشركات اللي شغالة في مجالك عن طريق البحث في أدلة الأعمال زي Yellow Pages و Search in MENA واستكشف مواقع الإنترنت الخاصة بيهم، وماتنساش تدوّر في قسم الـ careers – Jobs في كل موقع تفتحه.. كمان موقع زي Glassdoor ممكن تعرف منه شكل المقابلات في الشركات الكبيرة والأسئلة اللي بتتسأل فيها وتتعرف على بيئة عمل كل شركة من الداخل.

ملتقيات التوظيف: مهمة عشان تتعرف على الشركات وتتواصل معاها بشكل مباشر. اعمل بحث بـ (Employment Fair + companies Emails) عشان توصل لإيميلات الشركات اللي شاركت في ملتقيات توظيف -حصلت في بلدك قبل كده- وتواصل معاهم. غير كده فيه ملتقيات توظيف إفتراضية “بتتعمل على الإنترنت” تقدر تحضرها وتستفاد منها.. هتلاقي موقع بيت.كوم بينظم ملتقى اونلاين (يشبه اللي بيحصل على أرض الواقع كتير) أول كل سنة، بيجمع شركات في المنطقة العربية: Virtualjobfai.bayt.com.

- شبكات الأعمال المهنية والتواصل مع الخبراء في مجالك

شبكات الأعمال الإجتماعية أو الشبكات المهنية على الإنترنت زي Linkedin و Branchout من الأدوات المهم جداً تستخدمها وتكون فعّال عليها، مش بس عشان تلاقي فرصة عمل مناسبة، لكن كمان عشان تبني عليها شبكة علاقات ومعارف في مجال عملك هتفيدك في شغلك ومشاريعك وهتتعرف منها على ناس خبرة في تخصصك من مختلف دول العالم، وهتفضل على تواصل معاهم وتتابع أخبارهم وتتعلموا من بعض.

40% من مستخدمي لينكدإن هم “مديرين”؛ فمن الحاجات اللطيفة اللي ننصحك تعملها عليه بعد ماتكون بنيت شبكة علاقات معقوله.. انك تبعت للناس اللي ليهم خبرة في مجالك وانت عاوز تتعلم منهم، رسالة (ياحبذا لو موجود فيها الـcover letter) تسألهم فيها على فرص تدريب Internship في الشركات اللي هم شغالين فيها، أو تقترح عليهم يستضيفوك لمدة يوم واحد في “يوم ظل الموظف” Job Shadow Day بحيث تتعرف فيه على طبيعة المجال قبل ماتقرر تشتغل فيه.. من بين 5 أو 10 رسائل هتبعتهم هتلاقي فرصة، أو هتستفاد كتير من مجرد ردهم عليك.. جرّبها.

- مجموعات ومواقع التواصل الإجتماعي

المبادرات الشبابية اللي بتقدم فرص عمل تناسب اهتمامات الشباب أو بتحاول تحل مشكلة البطالة عن طريق عرض الفرص ومشاركتها.. ساعات كتير بيكون عندهم فرص مميزة جداً مش موجودة عند شركات أو مواقع التوظيف الكبيرة، ومش بالضرورة يكونوا عاملين موقع بيجمع الوظائف من الشركات، لكن بيكتفوا بإنهم يقوموا بنفس الدور من خلال مجموعة على فيسبوك أو ياهو، زي “نفسي أشتغل في مجالي“.

فيه فرصة هنا انك تتعرف أكتر على الشخص اللي طرح الوظيفة بنفسه وتقدر تتواصل معاه، غير كده المجموعات دي ممكن تكون بيئة تقدملك نصائح وتساعدك تشتغل في التخصص اللي انت حاببه، عندك YallaWork و Maaan مش بس بيعلنوا عن الفرص المتاحة حواليهم، لكن كمان بيحاولوا يساعدوا بعض ويتعلموا من بعض.

خاصية الجراف سيرش “المكان المخصص للبحث” في فيسبوك تقدر تستخدمها في انك تبحث عن الأشخاص حسب وظيفتهم أو حسب المكان اللي شغالين فيه (اللي هو انت بتفكر تشتغل فيه)؛ فممكن تبحث كده: My friends of friends who work as Project Coordinators هيطلعلك ناس معينه.. يُفضل تعرف اسم الشخص وتبحث عنه وتتواصل معاه على لينكدإن.

وفي محرك البحث الخاص بـتويتر.. جرّب تبحث بأكتر من هاشتاج جنب بعض في مرة واحدة، زي كده: #jobs #Alexandria ابحث بكلمات مختلفة وشوف النتائج اللي هتطلعلك.

على فكرة مش دي بس كل الأدوات أو الطرق اللي ممكن تستخدمها اونلاين عشان تقرّب من فرصة العمل اللي انت متوقعها، النت فيه أكتر من كده بكتيير! المهم انت حققت كام في المية من اللي اتكلمنا عنه؟ وعملته بكفاءة قد إيه؟ ممكن طريقة واحدة أو أداة من اللي قلناهم تكون سبب في انك توصل لهدفك، المهم تكون محترف في تطبيقها.

لو عندك طرق تانيه جربتها وفادتك ممكن تشاركها معانا في التعليقات.

باسم مُسلَّم

مدير البحث والمحتوى لـ "نتـنولوچي"، مهتم بالبحث والكتابة حول موضوعات "الإنترنت والمجتمع" عن كيفية الاستفادة من الشبكة وأثرها على الناس.


comments powered by Disqus